Бројката на уапсени лица по третиот ден на насилните протести во Франција, по убиството на 17-годишното момче, се искачи на 667. Според францускиот министер за внатрешни работи, Жералд Дармијан повредени се вкупно 294 полицајци, но никој сериозно. Тој вчера распореди контингент од 40.000 полициски службеници.
И третата ноќ ширум регионот на Париз имаше нереди кои се проширија и во Белгија, откако тинејџер од алжирско-мароканско потекло беше убиен од полицаец за време на сообраќајна контрола во вторникот наутро. Запалени автомобили и згради, оштетени излози, превртени автобуси, а демонстрантите ја нападнаа полицијата со камера и пиротехнички средства. Во пламен беше и деловна банка во Нантер, пожарот се прошири и во станбените единици над експозитурата. Пожарникарите го изгасија пожарот во кој нема повредени лица.
Насилства избија во Марсеј, во Лион, во По, Тулуз, во Лил, во Бордо, во Гренобл, како и делови на Париз, вклучувајќи го и работничкото предградие Нантер, но и во Брисел.
Обвинителите вчера отворија официјална истрага за убиство од небрежност против полицаецот кој е задржан во притвор.