Собранието даде зелено светло, Владата ги згасна надежите. Месец дена, откако се изгласаа законските измени и се смири гневот кај јавноста, власта подзаборави на пациентите со цистична фиброза. Функционерите си изгласија повисоки плати, пари за лекот сè уште нема.
Пациентите со цистична фиброза повторно го вклучија црвениот аларм. Не гледаат решение освен повторно да излезат на протест. Претходниот им пропадна уште пред да почне, бидејќи министерството за здравство им вети лек, но сè уште го нема. По најавата за нов протест, беа експресно повикани од кабинетот на министерот. Повторно без конкретни решенија, само дискусија.
Целта на дискусијата беше запознавање со процесот со кој М3 веќе активно работи на изнаоѓање на сеопфатно решение за овие пациенти. За таа цел е ангажирана работна група која од пред две недели работи на случајот. Претставници од асоцијацијата, исто така, ќе бидат повикани и на состанок со работната група за директно да бидат вклучени и запознаени со предизвиците и чекорите потребни за да се стигне до решение за оваа ранлива категорија, велат од Министерството за здравство.
Во Македонија има 140 пациенти со цистична фиброза. На 9 март годинава осум пациенти почнаа со примање на лекот, а од денес уште четворица. Останатите ќе чекаат државата да одвои пари за да ја купи Трикафта.
Симона Петровска