За неколку дена ќе биде објавена пресудата, откако денес во тетовскиот Основен суд заврши главната расправа на првото рочиште за случајот за убиство на 16-годишникот, чие тело беше пронајдено во реката Пена, на местото викано Бањиче.
Осомниченото женско лице кое се товари за убиство е на возраст од 17- години, поради што адвокатот, Ибраим Бајрами, кој учествува во процесот како нејзин бранител, вели дека според законот не смее да открива детали во јавноста.
„По наредба на Судот за кривичните предмети коишто се водат против малолетници во кои жртви се малолетници не се дозволени изнесување на било какви околности за настанот на кривичните постапки“, изјави Ибраим Бајрами, адвокат на обвинетата.
Овој случај ја разбранува јавноста, кога на 22 декември минатата година, по 7-часовна потрага, во речните води беше пронајдено безживотното тело на 16-годишникот од Ново Село.
Веќе следниот ден Јавно обвинителство објави дека е осомничена 17-годишна девојка, која по вербална расправија во автомобил кај местото викано Бањиче, со предмет го удрила оштетениот во главата неколку пати, нанесувајќи му тешки телесни повреди опасни по живот. Потоа го турнала во реката Пена.
Данијела Билбилоска