Косовскиот премиер Албин Курти изјави дека формирањето на Заедницата на српски општини во северно Косово, на која инсистираат западните земји, не е приоритет за неговата влада и ја повтори загриженоста дека таа ќе функционира како мини држава. Наместо тоа, Курти предлага Белград и Приштина да ги продолжат преговорите во Брисел.
Да одржиме искрени разговори во Брисел на највисоко ниво и да разговараме за сите прашања. Неопходна е целосна нормализација, но меѓусебното признавање е од централно значење. Не велам дека договорот би бил само за меѓусебно признавање, во договорот ќе има и други работи, но меѓусебното признавање ќе биде во центарот, рече Курти.
Западот, а особено САД последнава недела го зголемија притисокот врз Приштина да ја формира Заедницата на српски општини, откако Белград веќе изрази подготвеност да го прифати т.н француско-германски предлог. Американскиот амбасадор во Приштина Џефри Ховениер одржа низа средби со политички лидери, министри и претставници од цивилното општество, за да ги увери дека заедницата нема да доведе до формирање на мини држава во Косово, како Република Српска во Босна и Херцеговина. Но, Курти, кој не беше поканет на средбите, останува скептичен.
Да разговараме, да ги ислушаме сите, но не можета да барате од премиерот на републиката да ја изневери волјата на народот и државните интереси, рече Курти.
Заедницата на српски општини беше договорена во 2013 година, а деталите утврдени во 2015-та, но нејзиното формирање заглави откако косовскито Уставен суд ја прогласи за противуставна бидејќи не ги вклучувала и другите малцински етнички заедници.
Токму формирањето на оваа заедница, Србија го поставува како клучен услов за сите понатамошни договори со Косово. Објаснувањето на Србија е дека Косово мора да ги почитува обврките што ги презело со претходните договори. Став што го поддржува и меѓународната заедница.
Игор Трајков