Ние немаме намера да преговараме преку медиуми, како некои други партии, реагираат од партијата Алтернатива по инфомрациите кои се појавија во медиумите околу влезот на партијата Алијанса за Албанците во владата. Според порталот „Тетовасот“, партијата на Таравари добила понуда да ги преземе министерствата за правда и здравство, заедно со уште две заменички места, како и неколку директори. Од Алијанса за Албанците ниту ги потврдија, ниту ги демантираа овие инфомрации, посочувајќи дека официјалните преговори за евентуално приклучување на мнозинството сѐ уште не почнале. Но, Алтернатива има забелешки за начинот на кој се водат преговорите со Алијанса.
Имаме принципиелен став: кој има проблем, тој треба да ја поднесе цената за да си го реши проблемот. Најпроблематично во целиот овој процес е што начинот на кој се водат овие разговори, само го разводнува целиот блок партии кои се за ЕУ интеграции. Каква порака кон оние кои го поддржуваат ЕУ проектот праќа овој начин на преговори? Ако се продолжи на овој начин, останатите партии, само ќе се отуѓат од овој блок, реагираат од партијата.
Алтернатива забележува дека на тој начин не само што не се обезбедува потребното двотретинско мнозинство за уставните измени, туку и се урива кредибилитетот на „проевропските партии“.
Не сакаме да веруваме дека некој сака да го наруши про-европскиот коалициски капацитет. Кој мисли дека лесно може да ги наруши тие принципи, ќе плати висока цена. Ние сме подготвени за сите предизвици, тврдат од алтернатива.