-Јас имам посведочено како една срна беше удавена од куче кое што не следеше на терени. Додека извадив апарат да ја сликам срната, кучето ја имаше фатено и животното беше убиено, истакна Диме Мелоски од Македонското еколошко друштво (МЕД) на денешната трибина „Напуштените кучиња – закана за дивиот свет“.
Според него, како што пренесува радио МОФ, проблемот со напуштените кучиња во дивината последниве петнаесеттина години се зголемува, а кучињата вршат притисок на дел од фауната, како што се срните и дивите кози, бидејќи се создава нов предатор, напуштеното куче во дивина кое поради несовесните луѓе почнува да се потпира на своите инстинкти.
Најголем проблем според МЕД којшто лесно се припишува на кучињата всушност е предизвикан од неодговорните (или несовесни) сопственици и од системот кој не ги спроведува целосно законите. Целта е да се дојде до долгорочно размислување и изнаоѓање на трајни решенија, а заклучоците од трибината се следните:
– институциите не се еднакво информирани за проблемот и ова е нешто за кое ние можеме да обезбедуваме повеќе информации.
– Законот за заштита и благосостојба на животните не се спроведува во целост а особено кога станува збор за програмите за бездомни кучиња т.е. нивниот третман, заловување и обезбедување на прифатилишта особено во рурални средини и во општини кои немаат капацитети (а имаат одговорност).
– Најголем дел од капацитетите на невладините организации кои работат на проблематиката се сконцентрирани на проблемите со бездомните кучиња во урбаните средини (каде се повидливи и полесно детектирани).
Голем проблем се и кучињата кои се напуштени и слободно се шетаат низ градовите. Најголем дел од општините иако имаат законска обврска немаат прифатилишта. Проблемот е создаван со години, а решението е многу тешко односно за да се стабилизира состојбата за да не се зголемува бројот на напуштени кучиња треба да се изврши стерилизација на 75 % од уличните и напуштените кучиња.
Во дивината пак овие напуштени животни кои се размножуваат без контрола мора да се снаоѓаат и полека стануваат соперници на рисовите или пак се парат со волците.
Мелоски од МЕД објасни дека напуштените кучиња во дивината стануваат мршојади и доколку наидат на плен кој веќе е уловен од рисови или волци, тие го довршуваат пленот. Во природата тоа претставува голем проблем за рисовите кои што се територијани животни и не можат да се спротивстават на кучињата и да бараат нов плен.
-Машките возрасни рисови не претставуваат проблем бидејќи мажјакот може да се снабди со плен, но проблемот е кај женките кои пробуваат да ги прехранат своите доенчиња. Тука може да настане голем проблем бидејќи при недостиг на храна, доенчињата стануваат поподложни на паразити и не дочекуваат полова зрелост, туку угинуваат. Само 50 отсто од младите достигнуваат полова зрелост кај рисот. И кога се работи за популација која е голема како во Скандинавија или на Карпатите, популацијата може да ги издржи овие загуби, но кога се работи за популација што е екстремно мала, како што е Балканскиот рис, кој има отприлика 40-50 возрасни единки на територија на Македонија, Албанија и Косово, тоа претставува огромен проблем бидејќи секоја загуба, возменирување на рисот може да доведе по несакани последици до популацијата, истакна Мелоски на трибината.
-Забележани се и хибриди (волци и кучиња) главно во пределот на Маврово и Јасен, каде на камерата имаме видено чистокрвни волци, но и нешто што не наликува нити на куче, нити на волк и ова претставува огромен проблем, рече Мелоски.
Од МЕД предупредија и на многу случаи кога напуштените куќиња не се снаоѓаат во рурални и планински предели каде се отфрлени и гинат и не преживуваат.
Сите проблеми мора да се решаваат со почитување на законите и со строги казни за оние кои ги напуштаат кучињата и ги фрлаат или низ градовите или уште полошо во планина и во слески области.