Ако бугарските барања поврзани со идентитетските одредници влезат во преговарачката рамка за земјава тоа ќе биде лош и опасен преседан за ЕУ смета Гералд Кнаус, претседателот на влијателната тинк-тенк организација Европска иницијатива за стабилност. Според него, дури и да сака Македонија да направи некакви отстапки, тоа да го направи билатерално, и да не се дозволи да се стават во преговарачката рамка.
-Ако Македонија сака тоа да го направи тоа е нејзина работа, но ова за ЕУ би бил опасен преседан, бидејќи внесувате прашања кои се целосно билатерални и кои никогаш не би требало да бидат основа за ставање на вето на европско ниво. Тоа не е добро, оти може да се појават многу други прашања во процесот на проширување со останатиот дел од Балканот. Затоа сметам дека ова е лош преседан, вели Кнаус во интервју за МИА.
Тој не е оптимист дека Македонија може да ги почне преговорите со ЕУ на крајот од француското претседателство и покрај напорите на Париз и Берлин да помогнат за тргање на ветото,
– Според моето искуство од минатото со грчкото вето, со словенечкото вето на времето на Хрватска, клучот за решение е промена во дебатата кај домашната јавност, а јас не гледам дека постои таква промена во моментов во јавниот дискурс во Бугарија. Кај вакви билатерални спорови она што мора да се случи е дека земјата која гo предизвикала мора да сфати дека не може да успее. Бугарија мора да сфати дека прашањето на бугарското малцинство не е проблем. Вистинскиот проблем е дека вие немате гаранции дури и да постигнете договор за ова, поголемиот проблем е дека Бугарија, односно некои во Бугарија го проблематизираат македонскиот идентитет. Ќе дојде моментот кога Бугарија ќе сфати дека не може да победи. Проблемот е што за ова треба време, а времето е единственото што Македонија го нема, вели Кнаус