Дали младите ќе останат без единствената институција која е надлежна за нив по најавената реорганизација на органите на државната управа со која се предвидува Агенцијата за млади и спорт, од досегашниот статус на самостоен орган, да премине како орган во состав на Министерство за односи меѓу заедниците, ќе се разговара денеска во Владата.
Од Националниот младински совет информираа дека од Владата добиле покана за работна средба на која најавено е присуство на претставници од Министерството за информатичко општество и администрација, Агенцијата за млади и спорт и Генералниот секретаријат.
Минатата недела со отворени писма до Владата се обратија трите најголеми чадор организации во Македонија, НМСМ, Коалиција СЕГА и Сојузот за младинска работа од каде побараа да не се укине Агенцијата за млади и спорт, туку таа да прерасне во Министерство за млади и спорт.
Од земјите во регионот, Србија, Бугарија и Црна Гора имаат Министерство за млади и спорт, Министерство за благосостојба на младите и децата има во Албанија, а додека пак Министерство за култура, млади и спорт има во Косово.
Мартин Николовски