Германија ќе повлече три батерии на ПВО системот „Патриот“ од Полска по, речиси, една година, откако беа распоредени во земјата, соопшти министерството за одбрана во Берлин.
Заедно со системот „Патриот“, во полскиот град Замошч, кој се наоѓа на 50-тина километри од границата со Украина, беа распоредени и околу 300 германски војници, со цел на заштита на градот на југот на Полска и важната железничка врска со Украина, пренесува „Ројтерс“.
Германија испрати систем „Патриот“, откако украинска ракета залута во ноември лани и го погоди селото Пржеводов. Инцидентот предизвика стравувања дека војната во Украија би можела да се прелее во Полска.
Германското министерство во август најави дека е малку веројатно оти системот „Патриот“ ќе остане во Полска по Нова година, бидејќи треба да биде на располагање на силите на НАТО за брз одговор во текот на 2024 година или да биде испратен на одржување.
Во соопштението се наведува дека германските војници во петок ќе завршат со сите свои операции во Полска и од наредната недела ќе почнат со преместување.