Ниту една од иницијативите формално не е врзана со напредокот во евроинтеграции и пристапување и ниту една не е предуслов, изјави Марко Трошановски, претседател на Институт за демократија, во вечерашната Топ тема на ТВ Телма.
„Застојот во процесот е вина на неконзистентноста на Европската Унија во спроведување на нејзините сопствени стандарди од една страна и неволноста на земјите од Западен Балкан да се реформираат автентично од друга страна. Меѓутоа, во ниту еден случај тоа не се должи на процесите“, рече Трошановски, алудирајќи на процесите како „Брдо-Бриони“, „Отворен Балкан“, Јадранско-јонската иницијатива, итн.
Тие процеси, според Трошановски, имаат за цел само да му помогнат на регионот да ја зголеми внатрешната меѓусебна соработка, нејзино продлабочување и да се прошири кон Европската Унија.
„Ние се проширување со тоа што се интегрираме во ЕУ, а се продлабочуваме со тоа што ја зголемуваме регионалната соработка. Сите регионални процеси и иницијативи во голем дел беа заложници во неразрешените билатерални спорови меѓу земјите од Западен Балкан, пред сè зборувам за Косово – Србија, меѓутоа далеку е дека е единствен спор кој што тлее“, додаде Трошановски.
Тој истакна дека Берлинскиот процес е најструктуриран од сите, бидејќи има директни финансиски механизми кои што може да го поддржуваат, има инсфраструктура, има Совет за регионална соработка кој што надгледува кој и што има завршено, кој што се обврзал дека ќе направи и до каде е стигната имплементација на одредени закони кои се синхонизирани од европското аки.