Унгарскиот премиер Виктор Орбан денеска изјави дека Будимпешта е против намерата на Европската Унија за уплата на повеќе средства за Украина. Барањето на Брисел за унгарските власти, како и за полските, да издвојат дополнителни средства, Орбан ги нарече „смешни“, додека на двете земји им се скратени пари од ЕУ фондовите за обнова поради спорот на владеење на правото.
На самитот на ЕУ, кој е во тек, Орбан планира да побара отчет како се трошат парите од заедничкиот Буџет на Европската Унија и на што и како се потрошени досегашните 70 милијарди евра на Украина. Според него, досегашните мерки што ги презеде Унијата и средствата што се издвоени за Украина не ги испорачале очекуваните резултати.
Вториот ден од Самитот во Брисел почна со жестока дебата за азилот и мигрантите. Лидерите на Европската Унија ги прекинаа преговорите за миграциите, бидејќи Полска и Унгарија го блокираа напредокот, откако претходно овој месец беа надгласани за планот за поделба на мигрантите кои стигнуваат во Европа меѓу 27-те земји членки. Двете земји одбија да поддржат изјава од Самитот за која е потребна едногласност.
Покрај азилот и миграциите, на дневен ред на Самитот на ЕУ се и односите со Кина, надворешната политика, ситуацијата на северот на Косово и економски прашања.
Сашко Димовски