По велигденските празници, почнуваат состаноците во Работната група за формулирање на уставните измени. Владата одлучи да го почне овој процес, без оглед што во Работната група нема претставник од ниту една опозициска партија, а голем дел од експертите имаат правни дилеми. Лидерите на двете најголеми партии не се помрднуваат од своите позиции: Ковачевски го нарече Мицкоски нерелевантен, а тој одбива да разговара на оваа тема.
Со опозиција или без неа, а поверојатно без неа, наредната недела почнува процесот за менување на Уставот.
По Велигден, Работната група при Министерството за правда ќе почне со состаноци за формулирање на уставните амандмани.
На 10-мината партиски и тројца претставници од институциите, утре или најдоцна задутре, ќе им се придружат 6 до 8 експерти.
ВМРО ДПМНЕ, Алтернатива, Левица и Демократски сојуз одбија да учествуваат.
Опозицискиот лидер Мицкоски, не сака ниту да одговара на прашања поврзани со оваа тема бидејќи со „хрватскиот предлог“ кажал `се што има да каже.
За премиерот Ковачевски, Мицкоски е нерелевантен, бидејќи процесот што обезбедува европска иднина не зависи од него туку од пратениците.
Премиерот објаснува дека текстот што ќе го утврди Работната група ќе биде испратен до Владата, која ќе ја преземе улогата на предлагач пред Собранието.
Паралелно, ќе се организира јавна дебата, која ќе го опфати и најважното прашање: дали е можно да се придобие дво-третинско мнозинство за отварање на Уставот.
Соња Николовска