Зад убавите згради во Кисела Вода градежен шут, отпад, дотраени производи за домаќинство, стара облека. Ваква беше сликата во непосредна околина на спортската сала Расадник кога екипата на телевизија Телма отиде на лице место да ја провери ситуацијата по поплаките на граѓаните кои стигнаа до нашиот медиум. Откако се потврдија нивните забелешки одговори побаравме од градоначалникот Орце Ѓорѓиевски.
По разговорот во општината, заедно со градоначалникот се вративме на локацијата, но сликата беше многу поинаква. Луѓе со лопати и гребла беа на терен, некои и со голи раце го расчистуваа просторот. Денес најдоцна викендот местото мора да биде расчистено рече градоначалникот Ѓорѓиевски.
Градоначалничката на град Скопје, Данела Арсовска за депоните кажа дека не се нејзина примарна надлежност, но за да го направат град Скопје поубаво место за живеење тие веќе исчистиле некои депонии.
Вакви депонии има на многу локации. Конкретно за оваа депонија од општината ни кажаа дека се подготвува Детален урбанистички план и дека веднаш по изборот на идејното решение на меѓународниот конкурс ќе се пристапи кон спроведување на тендерска постапка за избор на изведувач за изработка.Последен пат таков план имаше во јануари, но тој пропадна бидејќи се пријавиле само четири труда од потребни седум.
Тамара Марковска