Претседателската позиција во ДИК ќе им припадне на СДСМ. Неофицијално, се спомнува дека местото го посакува досегашниот вицепремиер, Бојан Маричиќ.
Според Член 27, Став 5, од поимникот на Изборниот законик, оваа позиција ѝ припаѓа на опозициската партија со најголем број на гласови, освоени на парламентарните избори, и нема никаква врска со бројот на пратенички мандати.
Во случајов, СДСМ ќе треба да се откаже од еден од тројцата членови и да го добие претседателското место, додека актуелниот претседател, Александар Даштевски, предложен од ВМРО-ДПМНЕ ќе стане член на ДИК и ќе се распише оглас за уште еден член од оваа партија.
Потпретседателката Дитмире Шеху, исто така станува член, а на нејзино место треба да дојде човек предложен од коалицијата „Вреди“.
Поимникот од Изборниот законик е јасен во однос на Државната изборна комисија. Во Член 2 Став 11 и 12 стои дека „позиција“ ја сочинуваат партиите на власт кои на последните избори за пратеници освоиле најмногу гласови. „Опозицијата“ ја сочинуваат партиите во опозиција кои на изборите освоиле најмногу гласови.
Но, се очекуваат дилеми и недоразбирања околу тоа кому треба да му припаднат собраниските комисии, со оглед на тоа што СДСМ и ДУИ имаат ист број на пратеници, а во Деловникот нема толкување од типот „најмногу освоени гласови“,туку само одредба „од редот на пратениците од опозицијата“.
Според Член 124, претседателите на анкетните комисии по правило се од редот на пратениците на пратеничките групи во опозиција. Тие го предлагаат и претседателот на Комисијата за финансирање и буџет, како и на Постојаната анкетна комисија за заштита на слободите и правата на граѓанинот.
Пракса е и опозицијата да претседава со комисиите кои вршат надзор над тајните служби и над следењето на комуникациите. Дознаваме дека, најмалку за една од овие комисии се заинтересирани ДУИ, односно поранешниот спикер, Талат Џафери.
Далиборка Демјанска Цветановска