„Титаник 3“ повторно потона. Функционерите од ДУИ, Исмет Гури и Ејуп Алими не испливаа, и второто судење за случајот не смени ништо. Судот ги повтори казните од три ипол години во затвор за кражба на гласови во Чаир, а тие одлуката ја дочекаа проѕевајќи се.
Осудени се затоа што, по завршувањето на првиот круг од гласањето за градоначалник на Чаир на локалните избори во 2013 година, во записниците додавале гласови на кандидатот од ДУИ, додека одземале од кандидатите на ВМРО-ДПМНЕ и ДПА. Гури, според пресудата, на еден претседател на избирачки одбор му се заканил да го потпише преправениот записник бидејќи во спротивно ќе биде лошо за него, а му рекол и дека работата е договорена со ВМРО-ДПМНЕ, со кои ДУИ тогаш беа во коалиција.
Покрај менувањето на бројот на гласови, меѓу незаконските активности на двајцата функционери од ДУИ, според пресудата, е и тоа што потоа самите ставале печат од избирачките одбори и ги фалсификувале потписите од претседателите на одборите.
Првото судење започна во март 2018 година, а пресуда беше донесена по две години. Но, веќе следната година, Апелација ја укина пресудата и го врати предметот на повторно судење.И денешната пресуда не е правосилна, односно странките имаат право на жалба до Апелација која овој пат ќе треба да одлучи мериторно.
Двајцата првостепено осудени се единствените поистакнати функционери од ДУИ за кои се дојде до пресуда во случаите што ги отвори Специјално јавно обвинителство (СЈО). Според нивните генералии што беа прочитани и при изрекување на пресудата, Гури во моментов е заменик-управник во УЈП, а Алими државен советник во Министерството за политички системи и односи меѓу заедниците, со кое раководи вицепремиерот Артан Груби.
Далиборка Демјанска