Во Иран денеска ќе биде погребан претседателот Ебрахим Раиси кој загина пред неколку дена во хеликоптерска несреќа. Неговото почивалиште ќе биде лоцирано на најсветото место за шиитските муслимани во Исламската Република, што е последен знак на почит кон штитеникот на врховниот водач, ајатолахот Али Хамнеи.
Погребот на Раиси во светилиштето Имам Реза во Машхад опфаќа неколку дена поворки низ поголемиот дел од Иран, со цел да се зајакне теократијата на земјата по несреќата во која загинаа тој, министерот за надворешни работи на земјата и уште шестмина други.
Илјадници ожалостени во Иран утрово се приклучија на масовната погребна поворка.
Смртта на Раиси и министерот за надворешни работи Хосеин Амир Абдолахиан доаѓа во политички чувствителен момент за Иран, како на домашната сцена така и во надворешните односи на земјата. Раиси, кој имаше 63 години, беше споменуван како можен наследник на врховниот лидер на Иран, 85-годишниот ајатолах Али Хамнеи.