Над 350 луѓе ноќеска учествувале во потрагата по двегодишната Данка Илиќ во околината на местото Бањско Поле кај Бор во Србија откако девојчето исчезна вчера попладне.
За време на студената ноќ, спасувачите го пребарувале теренот во обид да го најдат девојчето кое го снема вчера околу 13:45. Потрагата ја раководат полицијата и противпожарната служба.
По исчезнувањето на Данка, во Србија за првпат е активиран системот “Најди ме” (Амбер алерт) создаден за брза реакција во случаи на исчезнати деца. Се користат дронови со топлотни камери, хеликоптери и кучиња трагачи во потрагата.
“Има кафеава коса, кафеави очи, височина околу 85 см. Во моментот на нејзиното исчезнување таа носеше маслинесто зелена јакна, виолетови панталони и црни патики“, стои во описот на малата Данка на “Најди ме”. Девојчето не зборува но се одзива на повици на нејзиното име.
Мајката на девојчето за медиумите во Србија изјавила дека била со ќерката и синот во Бањско поле кога девојчето исчезнало.
„Додека се свртев, ја снема. Уште нема две години, во мај ќе наполни. Не зборува уште. Ја повикував, таа не ми одговори. Во близина има шума. Му се молам на Бога што побрзо да ја најдеме“, изјавила мајката на Данка, Ивана Драгомировиќ.