Зинедин Зидан е нов селектор на француската фудбалска репрезентација. Легендарниот поранешен репрезентативец денеска беше официјално претставен во Париз и потпиша четиригодишен договор, според кој ќе ги предводи „триколорите“ до Светското првенство во 2030 година.
Зидан на селекторската функција го наследува Дидие Дешан, кој замина по 14 години на кормилото. Неговиот мандат заврши по освоеното четврто место на неодамнешниот Мундијал. Дешам ја одведе Франција до светската титула во 2018 година, трофејот во Лигата на нации и финалињата на Европското првенство во 2016 и Мундијалот во 2022 година.
Зидан се враќа на тренерската клупа пет години по разделбата со Реал Мадрид. Во два мандата со „кралскиот клуб“ освои три последователни титули во Лигата на шампионите и две во шпанското првенство, со што се вброи меѓу најуспешните тренери на својата генерација.
Како фудбалер, Зидан беше еден од предводниците на генерацијата што во 1998 година ја освои првата светска титула за Франција. Истата година ја доби и „Златната топка“, а со националниот тим стана и европски шампион во 2000 година.
Првиот натпревар на Зидан на клупата на Франција ќе биде на 25 септември, на гостувањето кај Турција во Лигата на нации, додека неговото деби пред француската публика ќе биде против Италија на 2 октомври.