Селекторот на женската одбојкарска репрезентација, Милош Гавриловиќ, го скрати списокот на 16 одбојкарки кои ќе бидат дел од тимот за претстојните два пријателски натпревари со Косово, но и за стартот на Европската лига. Подготовките траат веќе две недели, а првиот турнир нашите одбојкарки ќе го играат од 5 до 7 јуни во Порто.
Во изборот на новиот селектор се најдоа три дебитантки: одбојкарката на Газели Волеј, Даниела Горбок, како и средните блокерки на Младост УГД, Стефанија Кипријановска и Андреа Митиќ. По подолга пауза на скратениот список е и Мила Дикова, а тука се и Ерјона Јонузи и Софија Пандева на позицијата техничари. Во тимот се и добро познати имиња како Мери Бошкова и Теа Терзиевска.
Дуелите со Косово ќе бидат последна подготовка пред настапот во Европската лига. Во петок, на 29 мај, во СЦ „Форца“ во Скопје, нашите одбојкарки ќе го одиграат првиот контролен натпревар против Косово, додека вториот е закажан еден ден подоцна на гостински терен.
Македонија првиот турнир од Европската лига ќе го игра во Порто, каде покрај домашната селекција на Португалија, ќе ги одмери силите и со Унгарија.
ФОТО: Одбојкарска федерација на Македонија