Демократската унија за интеграција бара од Владата да го разреши министерот за економија Дурмиши. Според партијата, министерот „нема визија, ниту план за справување со економските кризи“.
„Она што го предупредуваше ДУИ веќе се случува. Нема никаква интервенција од Владата за да се заштити животниот стандард на граѓаните, оставајќи ги на милост и немилост на случувањата. Република Северна Македонија во моментов функционира без функционално Министерство за економија, во време кога се очекува значително зголемување на цените на основните производи, на трошоците за транспорт и, воопшто, поскапување на животот за граѓаните“, пишува во соопштението на Демократската унија за интеграција.
Доколку итно не се имплементираат предложените мерки, Демократската унија за интеграција очекува цените воопшто да се зголемат за повеќе од 10%, што сериозно ќе ги оптовари семејните буџети во земјата.
„Уште еднаш ја повикуваме Владата сериозно да ги разгледа предлозите на ДУИ, кои ќе ја имаат нашата целосна поддршка доколку мерките за заштита на граѓаните се процесуираат и усвојат во Собранието“, пишува во соопштението од ДУИ.
