Здравствениот систем во Македонија, за жал, е централизиран во Скопје. Ако одредени интервенции се работеа во внатрешноста, конкретно Тетово, Гостивар, Штип, Битола, немаше многу да се чувствува ова што се случи со Клиничкиот центар во Скопје, истакна доктор Башким Шабани, хирург уролог, во вечерашната „Топ тема“ на Телма ТВ.
„Имаме Клинички центри во Штип, во Битола, во Тетово кои што функционираат како клинички болници. Меѓутоа не се доволно опремени да направат потешки, покомплицирани интервенции кои што изведуваат во Клиничкиот центар во Скопје. Би било добро решение за растоварување на Клиничкиот центар, одредени поискусни хирурзи да одат во внатрешноста, пришто освен растоварување на Клиничкиот центар во Скопје, ќе се направи и обука на хирурзите таму. Со тек на време ќе се осамостојат и ќе можат барем 70 отсто од хируршките интервенции да изведуваат таму. И тој товар нема да се чувствува во Клиничкиот центар“, смета доктор Шабани.