31 годишниот Игор Пехчевски кој пред два дена пред камерата на Телма отворено говореше колку им е потребен лекот трикафта на болните од цистична фиброза, но и дека му е потребно вработување за да има нормален живот и да не биде цел живот на товар на семејството, веднаш по сторијата добил најава дека надлежните институции се ангажираат за решавање на неговиот проблем.
Имал средба со градоначалникот на Општина Берово, Звонко Пекевски, а се очекува од утре да се бара решение, односно вработување во некоја од институциите.
Игор вели дека пациентите со цистична фиброза живеат во страв дека здравствената состојба во секој момент може да им се влоши и да завршат во изолираната соба на Клиниката за пулмологија во Скопје.
На возрасните им е потребна поддршка од системот, бидејќи по нивната 26-та година остануваат без бесплатни лекарства.
КОД: Исповед за болката и трка за подолг живот- цистична фиброза и државна негрижа
Државата едноставно ги смета веќе за здрави пациенти. Финансиската помош изнесува само 3.500 денари.
Ова младо момче забележува дека целиот трошок околу лекувањето и примањето на соодветна терапија оди на товар на семејството.
Половина од платата на неговата мајка се троши токму за неговото лекување.
По нашата сторија и коментарите на социјалните мрежи на прилогот на Телма доволно говорат за без резервната поддршка која ја доби ова момче со цистична фиброза од македонската јавност и за итна набавка на лекот трикафта за околу 130 пациенти, како и за неговото вработување.
Викторија Димитрова Јованова