Планина од цвеќиња пред концертната сала во Москва додека Русите тагуваа по жртвите на нападот во кој загинаа над 130 луѓе.
Музичката сала во предградието на Москва, каде вооружени напаѓачи отворија оган врз присутните на концертот, остана поцрнета руина која тлее, бидејќи бројот на загинати изнесуваше 143, што го прави нападот најсмртоносниот во Русија во последните години.
Властите соопштија дека билансот сепак може да се зголеми.
Киев силно негираше каква било вмешаност во нападот врз музичката сала „Крокус“ во Красногорск, а огранокот на групата Исламска држава во Авганистан ја презеде одговорноста.
Претседателот Владимир Путин рече дека властите приведоа вкупно 11 лица во нападот, во кој беа ранети и повеќе од 100, нарекувајќи го „крвав, варварски терористички чин“.
Тој денешниот ден го прогласи за ден на жалост и рече дека се воведени дополнителни безбедносни мерки низ цела Русија.
Инспекторите вчера ги чешлаа јагленосаните остатоци од салата. Стотици луѓе застанаа на ред во Москва за да даруваат крв и плазма, соопшти руското Министерство за здравство.
Тврдењето на Путин дека напаѓачите се обиделе да побегнат во Украина следеше по коментарите на руските пратеници кои веднаш по нападот го вперија прстот кон Украина.
Украинскиот претседател Володимир Зеленски налутено ги отфрли обвинувањата на Москва како обид на Путин и неговите поручници да ја префрлат вината на Украина додека сопствениот народ го третираат како „потрошлив материјал“.
Исламска држава, која изгуби голем дел од своето тло по воената акција на Русија во Сирија, долго време беше насочена кон Русија.
Групата вчера издаде ново соопштение во кое вели дека нападот бил дел од тековната војна на ИД со земјите за кои таа вели дека се борат против исламот.
На 7 март, само неколку часа пред амбасадата на САД да предупреди за неизбежни напади, највисоката руска безбедносна агенција соопшти дека спречила напад врз синагога во Москва од страна на ќелија на ИД и убила неколку нејзини членови во регионот Калуга во близина на рускиот главен град.
Неколку дена пред тоа, руските власти соопштија дека шестмина наводни членови на ИД биле убиени во престрелка во Ингушетија, во рускиот регион Кавказ.