Голем број московјани денеска се собраа пред концертната сала Крокус во Москва, откако вооружени напаѓачи синоќа упаднаа и извршија страшен терористички напад во кој загинаа најмалку 143 луѓе, а голем број се повредени.
Купишта цвеќиња почнаа да се трупаат пред објектот, додека ожалостените се собираат да им оддадат почит на жртвите.
Маргарита Бунова заедно со нејзиниот сопруг го преживеаа нападот и раскажува за пеколот низ кој поминаа бегајќи пред рафалните стрелби на терористите. Со солзи во очите и растреперен глас се сеќава на моментите на „живот или смрт“ за кои вели ќе останат врежани во нејзината меморија до крајот на нејзиниот живот.
– Беше 19:47 часот. Слушнав експлозија, искрено мислев дека е петарда. Мислев дека, веројатно, уметниците што дојдоа беа поздравени од обожаватели. Но, тие беа тука, тие не застануваа, имаше врескање, паника. Сфатив дека нешто не е во ред. И кога јас и мојот сопруг сфативме дека треба да се спасиме, да трчаме, ме фати за рака. Само погледнав назад, самите луѓе веќе беа долу, почнаа да пукаат во салата. Почнаа да пукаат, маж ми ме зграпчи и отидовме низ горните катови, по противпожарните скали, раскажува Бунова.
За прв пат по нападот денеска се огласи и рускиот претседател Владимир Путин кој вчерашниот крвав пир го нарече „варварски терористички чин“. Порача дека непријателите нема да успеат во намерата да ја поделат нацијата како и дека сите напаѓачи се пронајдени и приведени, не прецизирајќи притоа за колку лица станува збор.
– Ќе им ја пружиме потребната помош на сите семејства кои доживеале страшна несреќа во животот, на ранетите и повредените. Изразувам длабоко, искрено сочувство до сите што ги загубија своите најблиски. Целата земја, целиот наш народ жали со вас. 24 март го прогласувам за ден на национална жалост, соопшти Путин.
Руската вицепремиерка Татјана Голикова, министерот за здравство Михаил Мурашко и гувернерот на московскиот регион Андреј Воробјов утрово ги посетија жртвите во болница.
– Работат квалификувани медицински лица, веќе се направени хируршки зафати на оние пациенти кај кои тоа беше неопходно. Пациентите се префрлени на одделението за интензивна нега и се под опсервација, информира Голикова.
Руските медиуми објавија видео на кое еден од приведените под сомнение дека учествувал во нападот на трговскиот центар „Крокус“ во околината на Москва, го признава делото и вели дека за тоа бил платен 5.000 евра.
На снимката, човекот се претставува, го дава својот датум на раѓање и тврди дека добил инструкции преку Телеграм, каде што, како што вели, „ја слушал молитвата на проповедникот“, а помошникот на проповедникот го контактирал пред околу еден месец.
Руските служби претходно обвинија дека напаѓачите поседувале патни исправи од Таџикистан, иако оваа земја денеска ги демантираше ваквите соопштенија бидејќи како што рекоа до нив се уште не стигнало официјално писмо за инволвираност на нивни државјани. Русија се сомнева дека терористите имале контакти со Украина велејќи дека поголем дел од нив биле фатени во близина на руско – украинската граница во обид да ја напуштат земјата. Украина негираше вмешаност во масакрот.
САД на почетокот од месецов непосредно пред изборите во земјата предупреди дека во рок од 48 часа можни се терористички напади и ги повикаа сите свои граѓани кои престојуваат таму да не посетуваат места и настани каде се собираат голем број луѓе.
Александар Петрески
(ВИДЕО) Еден од напаѓачите во Москва признал дека нападот го извршил за 5.000 евра
ФОТО: Објавена фотографија од терористите во Москва, Исламска Држава ја презеде одговорноста