Експертите од Комисијата за заразни болести денес одлучуваат за евентуални нови препораки и заклучоци. Ќе се анализира состојбата по драстичниот пораст на бројот на новозаразени со Ковид-19.
Тоа што е алармантно засега е дека се шири нова варијанта на вирусот, односно подваријанта на мутацијата Омикрон – која досега ја немаше.
Сега ја има насекаде во регионот и истата сè уште се истражува во лабораториите. За неа се знае дека многу побрзо и полесно се шири од постоечките варијанти.
А, информациите кои доаѓаат од Институтот за јавно здравје се доказ за големиот пораст на епидемиолошката крива.
Вчера објавените бројки за 19 јули покажаа дека дури 44% од направените тестирања се со позитивен наод на Корона. Состојбата во болниците засега е стабилна.
Тимот од лабораторијата за вирусологија при Институтот за јавно здравје во текот на изминатата недела направи секвенционирање на 48 примероци на лица позитивни на Ковид-19.
Кај 39 било пронајдено присуство на БА.5 – подваријантата на Омикрон.
Од блиското соседство – за Албанија веќе се знае дека оваа варијанта станува доминантна, а таму речиси половина од тестираните добиваат позитивен резултат, но матичните лекари велат дека бројката е многу поголема со оглед на тоа што многу од луѓето прават тестови во домашни услови и не се јавуваат на лекар ако не им се влоши состојбата.
Петар Догов