Сите процеси кои се во надлежност на Државниот испитен центар (ДИЦ), државна матура, државно тестирање, обука и испит за директори, приправнички испити, меѓународно тестирање ТИМС ќе бидат ставени во мирување додека не се исполнат нашите барања, му порачаа на министерот Бесими вработените во ДИЦ, кои веќе втор ден штрајкуваат.
Бараат покачување на платите, добивање согласност на барањето за изменување и дополнување на колективниот договор кое го испратиле до Министерството за финансии.
„Нашите плати беа заборавени со покачувањето на минималната плата на двапати веќе. Се покачија само платите на оние што беа со најниска позиција, односно минималците и веќе дојдовме во ситуација кога имаме изедначување на платите на повеќе од 11 лица од 29 вработени во ДИЦ. Од службата за обезбедување до службата до некој што е под советник се речиси изедначени платите на минималец“, вели претседателката на синдикалната организација на ДИЦ, Емилија Бошковска.
Тоа што го дознавме за платите на вработените во ДИЦ навистина е скандалозно и недозволиво, лица со високо образование кои работат за подобрување на македонскиот образовен систем да примаат толку ниски плати, вели претседателот на Сојузот на средношколци, Лука Павиќевиќ.
„Не верувам и не сакам да се случи одложување на државната матура, нејзино пролонгирање или неможност истата да се организира или одржи бидејќи ќе се создадат голем број на проблеми за оваа генерација на матуранти и средношколци. Верувам дека нема да се случи тоа и вработените во финансии ќе имаат слух за вработените во ДИЦ“, изјави претседателот на Сојузот на средношколци, Лука Павиќевиќ.
Вработените во ДИЦ да не ја доведуваат во прашање државната матура за која имаат и правна одговорност, им порача министерот за образование Јетон Шаќири. Да комуницираат со директорката и со другите институции и да чекаат да се реши Општиот колективен договор. Во меѓувреме, Телма побара и доби став од Министерството за финансии дали ќе бидат исполнети барањата на вработените во Државниот испитен центар.
Според Министерството за финансии, прашањето на платите на вработените во администрацијата треба да се реши преку системско решение, кое е одржливо на долг рок. Предложените измени на колективниот договор од Државниот испитен центар се доставени во Министерството за финансии и во моментов се чекаат дополнителни информации.
Нина Стефанова