Институциите треба да бидат во состојба на готовност, а носителите на функции будно да ја следат ситуацијата околу Украина, предупредува спикерот Талат Џафери, кој престојува во официјална посета на Косово. Неговиот домаќин, Глаук Коњуфца смета дека заради сите актуелни случувања во тој регион и агресијата од Русија, сите земји од Западен Балкан веднаш треба да бидат интегрирани во Европската унија.
„Несомнено е дека нашиот регион е чувствителен, кршлив и подложен на надворешни влијанија. Во тој контекст, треба да бидеме внимателни и над се – делот на оваа соработка е координирање во сите можни негативни ефекти што би можело да ги има во регионот. Несомнено дека ги согледуваме овие прашања, меѓутоа не мислам дека има нешто конкретно. Како и да е, за секаква ситуација институциите треба да бидат во состојба на готовност“, изјави претседателот на Собранието на РСМ, Талат Џафери.
Претседателот на Парламентот на Косово, Глаук Коњуфца, на заедничката прес конференција, рече:
„Треба целиот Балкан веднаш да влезе во ЕУ. До пред некое време ова се чинеше несеризно, но сега е исклучително сериозно со оглед на новонастанатата ситуација со Русија и нејзината агресија и обид за окупација на соседните држави кои имаат амбиции да се приклучат на НАТО и на ЕУ. Добро би било Европската унија да го направи проширувањето во еден одреден моментум за целиот регион. Мислам дека тој моментум е создаден токму сега“.