„Украина и Европската Унија никогаш не биле поблиски. Украинските граѓани, кои храбро се борат за европските вредности, заслужуваат да бидат во ЕУ. Сега треба што е можно поскоро да се отворат пристапните преговори и паралелно да се продолжи со реформите“, рече шефот на делегацијата на ЕУ во Македонија, Дејвид Гир.
Тој отфрли било каква споредба на пристапните процеси на Украина и Македонија бидејќи првата се соочува со воена агресија од Русија, додека Бугарија дава поддршка за Македонија иако има свои барања.
Амбасадорот на Франција, земјата претседавач со ЕУ – Сирил Бомгартнер, надополнува: „Дијалогот Македонија-Бугарија е отпочнат. Ние внимателно го следиме и сакаме да му дозволиме на овој ветувачки процес да се оствари во најдобри можни услови. Ќе бидат преземени сите активности за да може во најкраток можен рок да се постигне заедничката цел – отварање на претпристапните преговори“.
Амбасадорот Баумгартнер уверува дека приоритет на ЕУ не е членството на Украина туку изолирање на агресорот и поддршка на жртвите.