Петра Влхова исто како и вчера, така и денеска славеше на слаломската трка во финскиот ски-центар Леви во рамки на Светскиот Куп во алпско скијање.
Скијачката од Словачка дојде до четврта победа по ред во Леви со вкупно време 1:45,22 минути по двете трки. За Влхова ова беше вкупно 22.победа во кариерата во Светскиот Куп.
Денеска се повтори победничкиот подиум од вчера, бидејќи втора заврши Микаела Шифрин од САД со 47 стотинки заостанување, а трета беше Германката Лена Дуер.
Влхова очекувано е лидер во слалом со максимални 200 бодови од две трки, а Шифрин е втора со 160. Во генералниот пласман по четири извозени трки, двете скијачки се израмнети на врвот со по 260 бодови.
Следниот викенд скијачките се селат во САД, каде во Килингтон на програмата се трките во велеслалом и слалом.