(Фото: vinkulja.hr)
Хрватскиот министер за одбрана е тешко повреден во сообраќајна несреќа која утрово се случила кај Винковци.
Во несреќата загинал возач на комби во кое удрил министерот Марио Баножиќ додека престигнувал на патот на кој имало густа магла, објавија хрватските медиуми.
Според првичните информации, министерот Баножиќ има тешки и сериозни повреди, но не се животозагрозувачки. Префрлен е во болницата во Осијек.
-По првичното згрижување и дијагностика утврдено е дека станува збор за потешки повреди, меѓутоа во овие моменти тие не се опасни по живот. Но, поради потребен неврохируршки надзор, тој е префрлен во Осијек, изјавил за “Јутарњи” директорот на болницата во Винковци, др. Крунослав Шпорчиќ.
Има повреди на главата и на градниот кош како и скршеници на ногата. Најсериозни се повредите на главата, а медиумот “Јутарњи лист” објави дека на моменти Баножиќ е контактибилен, а на моменти не.
Министерот Марио Баножиќ тргнал во лов, сам бил во неговиот автомобил марка Џип и според информациите на хрватските медиуми престигнувал камион пред несреќата во која загина жител на хрватското гратче Привлака.