Струмичките пожарникари и денес се ангажирани на гаснење на пожарот на депонијата Шапкар кај село Добрашинци. На терен интервенираат две противпожарни возила со пожарникари-спасители, кои работат на локализирање и целосно ликвидирање на пожарот. Во интервенцијата е вклучена и механизација на ЈПКД „Комуналец“ – Струмица, која работи на затрупување на депонијата со цел да се спречи повторно активирање на жариштата.
„Ова е правецот на депонијата Шапкар, која се наоѓа на само неколку километри воздушна линија од Струмица. Целиот простор е маглив поради континуираното чадење од депонијата која е запалена од вчера.“Иако пожарот според надлежните нема опасност од ескалација, граѓаните велат дека последиците од чадот и непријатниот мирис повторно се чувствуваат низ струмичката котлина. Од граѓанската иницијатива „Здрава котлина“ реагираат дека проблемот со депонијата не е нов и предупредуваат дека ваквите ситуации стануваат повторлива закана за здравјето на населението.
„Утрото за струмичани започна со силно печење во носот и грлото. Целата котлина е покриена со густ чад, а воздухот повторно е тежок за дишење. Повторно плаќаме со сопственото здравје за туѓата негрижа, “ пишуваат екоактивистите.
Од „Здрава котлина“ апелираат граѓаните да останат во затворени простории, да ги држат прозорците затворени и да ги ограничат непотребните активности на отворено, особено најранливите категории.
Сузана Мицева