Марко Бецеки продолжува да доминира – Априлија го презема приматот од Дукати по првите три трки во сезоната во рамки на Мото ГП шампионатот.
Бецеки синоќа стигна до третата победа во исто толку трки, триумфирајќи на Големата награда на САД во Остин. Италијанецот е во серија од пет победи по ред, сметајќи ја и минатата сезона.
Со тоа се израмни со ретко достигнување – само трет Италијанец со ваква серија, а прв со три победи на стартот уште од Марк Маркез во 2014 година.
Априлија имаше двојна победа, бидејќи Хорхе Мартин заврши втор, додека Педро Акоста беше трет.
Фабио ди Џанантонио беше четврти, актуелниот бранител на светската титула Марк Маркез финишираше како петопласиран и покрај казната, зад него беа Енеа Бастијанини, Алекс Маркез, Раул Фернандез, Лука Марини и Франческо Бањаја.
Очекувано Бецеки е лидер во генералниот пласман со 81 бод, четири повеќе од тимскиот колега Мартин, додека Педро Акоста е трет со 60 бодови.
Во Мото ГП сега следува едномесечна пауза поради презакажаната трка за Големата награда на Катар, па мотоциклистите следно ќе се натпреваруваат за Големата награда на Шпанија на патеката Херез на 26-ти април.