Македонската фудбалска репрезентација и Република Ирска утре во Даблин ќе се соочат во пријателски натпревар по поразите во полуфиналниот бараж за пласман на Светското првенство.
Тешко е да се најде мотивација за игра по дебаклот во Копенхаген од Данска со 4-0, но селекторот Гоце Седлоски очекува позитивна реакција од играчите кои ќе добијат шанса.
„Секој пораз боли, тоа е неспорно. Сѐ уште го чувствуваме разочарувањето од мечот со Данска, но остануваме смирени и фокусирани. Работата на тренинзите е на високо ниво, а наша обврска е да реагираме многу подобро на теренот. Ги анализиравме пропустите и сега е на играчите што ќе добијат шанса да го дадат својот максимум. Особено ме радува тимскиот дух што владее во соблекувалната.
Против Ирска ќе мора да покажеме карактер, дисциплина и цврстина во дуелите. Ги следевме нивните последни настапи, против Чешка беа физички доминантни и агресивни во воздушните дуели, додека против Унгарија демонстрираа и технички квалитет. Очекуваме сериозен предизвик.
Планирам да ротирам и да им укажам шанса на неколку нови фудбалери, а верувам дека ќе ја оправдаат довербата. Сакам да нагласам дека репрезентацијата е отворена за сите, секој сам одлучува дали ќе го носи овој дрес. Се игра за Македонија, а не за поединци“, изјави Седлоски.
За голманот Столе Димитриевски не постојат неважни натпревари. Секој настап во репрезентацијата е мотив повеќе за победа.
„Јас сум професионалец, секогаш доаѓам да победувам, особено кога играм во дресот на Македонија. Имаме два убедливи порази во последните два натпревари, ги анализиравме грешките и јасно е дека мора да покажеме дисциплина во дефанзивата и да ги освоиме тие втори топки. Доколку бидеме подобри во тој сегмент, ќе имаме повеќе напади од противникот, а ривалите нема да имаат толку удари кон нашиот гол. Работиме, разговараме, анализираме и мора да се подобриме“, изјави Столе Димитриевски.
Утрешниот натпревар помеѓу Република Ирска и Македонија се игра со почеток од 20:45 часот во Даблин.
Фото: Фудбалска федерација на Македонија