Земјоделците кои протестираат низ Грција покажуваат први знаци на поделби, откако дел од нив изразија подготвеност за дијалог со владата, додека други најавуваат дека ќе продолжат со блокадите на патиштата.
Разликите стануваат видливи по состанокот на претставници од 18 блокади во Епаноми, близу Солун, на кој не присуствуваа големи групи земјоделци од Еврос, Килкис, Драма, Халкидона и Нисели. Продолжувајќи со протестите, блокадите предизвикаа сериозни сообраќајни нарушувања по празниците.
Долги колони се формираа на автопатот Атина–Солун кај Кастро и Мартино. Владата ги предупреди патниците на можни пренасочувања. Се очекува протестите денеска да се интензивираат со блокади кај Никаја, Бралос, Кастро, Аталанти, Тива, како и на наплатните станици Малгара и Дервени и во Туриа, Месиња.
Земјоделците најавуваат дека ќе се придржуваат до одлуките на националниот координативен комитет, а по Нова година се очекува национален состанок за повторно разгледување на протестите.
Инаку АМСМ информира дека утрово Грчкиот граничен премин Ники, кој е поврзан со македонскиот премин Меџитлија, е затворен за сообраќај за сите товарни моторни возила, а блокадата според најавите ќе трае до 16часот.
Т.Д.