Сопругата на 61-годишен српски државјанин кој беше повреден откако се скрши прозорец на авион за време на лет на „Рајанер“ од Солун ги опиша моментите во кои таа, сопатник и друг патник го држеа за да не падне од авионот, објави грчката МегаТВ.
Мажот е во болница и се опоравува од повредите и шокот. Неговото име не беше објавено, но грчките медиуми ја објавија неговата фотографија. Сопругата, чие име исто така не е објавено, за грчкиот медиум раскажа што точно се случило.
„Веќе летавме 30 до 40 минути кога прозорецот одеднаш се скрши. Мојот сопруг седеше до прозорецот. Сè се случи за секунда. Прозорецот се скрши за време на летот и поради разликата во притисокот половина од неговото тело заврши надвор. Сè леташе низ кабината. Маските за кислород паднаа и никој не знаеше што да прави. Сите плачеа“, изјави неговата сопруга.
Според неа, нејзиниот сопруг прво го држеле таа и нивниот придружник, а потоа им помогнал маж што седел во следниот ред.
„Двајцата го држевме, а потоа еден господин од редот до нас се приближи и заедно го повлековме за рака, додека половина од неговото тело беше надвор од авионот. Безбедносниот појас, исто така, помогна да се спаси“, рече таа.
По инцидентот, авионот го сменил курсот и безбедно слетал во Солун, на аеродромот „Македонија“, а патниците биле евакуирани. Повредениот 61-годишен маж и луѓето што му помогнале биле префрлени во болница. Тамшошните медиуми додаваат дека за време на спуштањето на авионот, дел од оштетениот мотор наводно се одвоил и удрил во прозорецот на кабината. Истрагата за настанот е во тек.
Патник од Србија за малку ќе излеташе низ прозорецот среде лет со авион на Рајанер