Франција е првиот полуфиналист на Светското фудбалско првенство 2026 година, откако вечерва на стадионот во Фоксборо го совлада Мароко со 2-0.
„Триколорите“ доминираа против африканската селекција и заслужено дојдоа до триумф, кој лесно можеше да биде и поубедлив. Мароко беше надигран, но Франција отпорот на ривалот го скрши во второто полувреме.
Французите имаа неколку изгледни шанси во првите 45 минути, а најдобрата ја пропушти Килијан Мбапе. Капитенот на Франција не реализираше пенал што самиот го изнуди во дуел со Нусаир Мазрауи. Мбапе шутираше лошо, па голманот Јасин Боно успеа да му ја скроти топката.
Сепак, тоа не го поколеба францускиот голгетер. Во 60-тата минута Мбапе го отвори резултатот со прекрасен удар од надвор од шеснаесетникот.Само шест минути подоцна Франција го реши победникот, кога Усман Дембеле погоди за конечни 2-0.
Франција во полуфиналето ќе го чека победникот од пресметката меѓу Шпанија и Белгија. Во преостанатите две четвртфиналиња ќе играат Англија против Норвешка и Аргентина против Швајцарија.