Македонскиот борец Горјан Славески оствари нова победа во БКФЦ шампионатот, откако утринава по пет рунди го совлада Канаѓанецот Џони Тело со едногласна одлука на судиите.
Славески ја запиша осмата победа во натпреварувањето познато како бокс без ракавици и направи нов чекор кон враќање во битката за шампионскиот појас.
Тело се покажа како исклучително цврст ривал, издржа голем број удари и остана во борбата до самиот крај, но Славески беше подобар во текот на петте рунди. Македонскиот борец најсилниот момент го имаше во последната рунда, кога со одлично лево кроше го испрати противникот во нокдаун и практично ја потврди победата.
FOTN! GOGO SLAVESKI IS MADE OF STEEL! #BKFCHOLLYWOOD | Live NOW on BKFC+ pic.twitter.com/0NsYb9pBH3
— Bare Knuckle FC (@bareknucklefc) June 5, 2026
Судиите едногласно му ја доделија победата на Славески, кој со овој триумф покажа дека повторно е сериозен кандидат за врвот во велтер категоријата.
Славески во 2023 година беше шампион во БКФЦ откако запиша шест победи во исто толку борби, но потоа го напушти натпреварувањето и остана без појасот. Кам-бекот во БКФЦ го направи во август минатата година, кога го доживеа првиот и засега единствен пораз во кариерата од Џулијан Лејн. По тој неуспех, македонскиот борец врза две победи и повторно се враќа во игра за шампионски предизвик.