Еден месец откако градоначалникот на Карпош Сотир Лукровски отвори боледување, и ги префрли сите должности на советник во општината, премиерот денеска му се обраќаше на заменикот и го ословуваше како градоначалник.
Лукровски ги делегираше своите овластувања на Неделчо Крстевски – советник во општината, кој го презеде раководењето со општината. Тој денеска беше на отворање на базен во општина Крапош, а на кој присуствуваше и премиерот Христијан Мицкоски.
На прашање на новинарите дали ќе се плаќа карта за базенот – Мицкоски одговор побара од Крстевски со зборовите „ќе каже градоначaлникот“, а откако овој рече „Нe“, додаде „еве кажа градоначалникот – нема да се плаќа.
Лукровски беше избран за градоначалник на Карпош на последните локални избори, но по освојувањето на власта ретко се појавуваше во јавноста за на почетокот на мај целосно да се повлече со образложение дека има здравствени проблеми. Од тогаш Крстевски ја води општината.
За да се организираат нови избори, актуелниот градоначалник треба да поднесе оставка во општина Карпош која потоа го известува Министерството за локална самоуправа по што во рок од шест месеци се организираат нови избори во општината.