Холандската полиција почна проверка на постапувањата на своите службеници, откако на социјалните мрежи се појави снимка од приведување во центар за азиланти во Зејст. На видеото се гледа како полицаец грубо влече трудница по што таа паѓа на земја.
Инцидентот, според холандските медиуми, се случил на 19 мај во објект на Кампвеге во Зејст. Полицијата соопшти дека службениците интервенирале по пријави за закани и оштетување имот пришто, како што се наведува, е спомнат е нож. Уапсен е 30-годишен маж од Зејст кој во меѓувреме е пуштен на слобода.
На видео материјалот, кој предизвика бурни реакции во јавноста, се гледаат повеќе полицајци, полициско куче, маж и жена во ходник. Во еден момент еден од полицајците силно ја повлекува жената која паѓа по што настанува хаотична ситуација во која мажот се обидува да пријде до неа додека полицајците го совладуваат.
На другиот дел од снимката, жената, како што пренесуваат медиумите во Холандија, е влечена за дел од гардеробата или за коса, додека полицајците истовремено го држат мажот на подот.
Холандската полиција наведе дека на смимката која кружи на интернет се прикажува само дел од настанот и оти ќе бидат проверени сите околности, редоследот на постапување и оправданоста на употребата на сила. Полицијата тврди дека службениците делувале во „динамична ситуација“ и дека настојувале да ги заштитат присутните и себе. Истовремено е соопштено дека нема причини за сомневање во автентичноста на снимката.