Млад полицаец од Битола се обидел да го спаси брат му од плаќање казна за незаконско паркирање, давајќи лажен исказ дека автомобилот е во сопственост на министерството за внатрешни, со намера да ги доведе вработените на ЈППЈЛП во заблуда за да биде ослободен од глоба за прекршокот. Против него е поднесена кривична пријава за „злоупотреба на службената положба и овластување“, казниво по член 353, став 1, од Кривичниот законик.
„И.Д., на работно место „помлад полицаец“ во ПС Битола, на 25.03.2026 околу 17 часот, во период кога не бил работно ангажиран, отишол во просториите на ЈП за изградба и одржување на јавен простор за паркирање и уредување и организирање на јавен локален превоз на патници во Општина Битола, се претставил дека е полициски службеник и поднел барање за поништување на налог за наплата за нерегуларно паркирање на патничко моторно возило „ауди“, сопственост на неговиот брат, при што во рубриката „образложение на причината за поништување на налогот“ своерачно напишал МВР. Со наведеното дејствие дал лажна изјава дека возилото е сопственост на МВР со што сакал да ги доведе во заблуда вработените на ЈППЈЛП за да биде ослободен од плаќање на казната“, информира МВР.
Одделот за внатрешна контрола, криминалистички истраги и професионални стандарди ќе поднесе и предлог за поведување на постапка за утврдување на дисциплинска одговорност против И.Д.