Голема полициска акција против детска порнографија во повеќе градови низ Македонија спроведува Секторот за компјутерски криминал при МВР во соработка со Секторите во Битола, Струга и Струмица. Се вршат претреси на седум локации во насока на обезбедување докази за кривично дело „производство и дистрибуција на детска порнографија“, а веќе има уапсени осoмничени лица.
Според информации на Телма, станува збор за меѓународна операција за сузбивање на овој вид криминал. Откако МВР добило податоци од странска полиција дека нелегални активности се одвиваат и во земјава, спроведени се истражни дејствија и анализа на ИП адреси, а истражителите идентификувале двајца осомничени.
Еден од нив кај кој се врши претрес во Струга, е претседател на бугарското здружението „Струмичка петорка“ регистрирано во Струга. Тој, исто така е и водител на интернет подкаст со студио во Скопје. При претресите кај него се одземени компјутери и дигитални податоци, кои ќе бидат предмет на детално вештачење поради сомнежи дека содржат докази за поседување и споделување на нелегален материја.
Ќе се проверуваат и дали постојат други содржини поврзани со активностите на осомничениот, како и евентуални контакти со бугарски државјани кои се на црната листа за влез во Македонија поради ширење омраза кон македонскиот народ и јазик преку јавни настапи и социјални мрежи.
Од Основното јавно обвинителство кусо информираат дека по обезбедените наредби за претреси, во координација со МВР продолжуваат активностите за прибирање докази и целосно расчистување на случајот.
Емилија Мисирлиева