Австрија го освои последното тимско натпреварување во ски летови оваа сезона на завршницата во Светскиот куп во ски скокови што се одржува на Планица во Словенија.
Поради силниот ветер денеска на Планица, организаторите ја откажаа втората рунда. Австрија го освои првото место со вкупно 803,8 бодови, а најдобар беше Даниел Хубер, кој оствари скок од 244 метри. Во победничкиот тим беа уште и светскиот шампион Штефан Крафт, кој интересно имаше најслаб скок од сите Австријци денеска, а тука беа Даниел Шефенинг и Михаел Хајбек.
Словенечкиот тим го освои второто место со 793,3 бода, додека трети финишираа Норвежаните.
Утре на Планица е закажано последното индивидуално натпреварување во сезоната, а интересна ќе биде борбата помеѓу Штефан Крафт и Петер Превц за титулата во ски летови. Крафт моментално има предност од 34 поени во поредокот пред Словенецот, кој ќе биде силно мотивиран од домашните фанови.