Трката во планинско трчање „Крали Марко Треилс“ во недела на 10.март ќе се одржи по 11-ти пат во Прилеп. Ќе учествуваат 250 натпреварувачи од повеќе земји, кои ќе трчаат низ живописниот прилепски регион.
„Крали Марко Треилс“ се состои од две трки. Првата трка наречена „Трескавец треил“ е долга 18 километри и за неа има пријавено 160 натпреварувачи кои ќе трчаат од Варош во Прилеп па преку Марковите кули патеката ќе ги однесе кон Манастирот Трескавец и потоа назад во Прилеп.
Втората трка, „Камена Баба треил“ е во должина од 35 километри и во неа учество ќе земат околу 80-тина натпреварувачи. Патеката почнува исто така од Варош и продолжува до манастирот Трескавец па низ карпестите предели преку Камена Баба.
На трката која се одржува од 2011 година, ќе учествуваат околу 200 натпреварувачи од Македонија, додека останатите 50-тина се од 12 странски држави. Настанот е во организација на здружението ТРЕКС од Скопје.