(ФОТО преземено од kossev.info)
Игуманот на манастирот на СПЦ, Девина Вода во Косово, отец Фотије вчеравечер е протеран од Косово во Македонија, објави веб медиумот Коссев.
Отец Фотије чие граѓанско име е Александар Костовски е роден во Скопје во 1981-ва година, а по завршена музичка академија во Софија во Бугарија, во 2004-тата се замонашил во Косово во Епархијата на Српската православна црква по што во 2009-тата станал игуман на манастирот во близина на Звечан во северно Косово.
Тој е протеран откако поднел барање за продолжување на престојувалиштето во Косово. Службите во Приштина го притвориле и со образложение “причини од национална безбедност” му определиле протерување.
Од Рашко-Призренската Епархија во која спаѓа и протераниот свештеник обвинуваат дека косовските власти не се придржувале до Законот за верски слободи и противправно и произволно го протерале отец Фотије додека ги подигнувал веќе одпбрените документи за престој.
Случајот го набљудувале и претставници на ОБСЕ кои според СПЦ не добиле објаснување од Приштина за протерувањето на свештеникот којшто синоќа со полициска придружба е депортиран преку преминот Блаце.