Ден откако група Срби се обиде да го блокира патот во селото Бањска на Косово, и дојде до вооружен конфликт во кој загинаа тројца напаѓачи и еден припадник на косовската полиција, сите приоди кон Бањска се уште се блокирани од силни полициски сили, а околу селото се распоредени голем број полицајци со оклопни возила. Безбедносната состојба и натаму е тензична. Уапсени се шестмина напаѓачи, на кои им е одреден притвор од 48 часа, а се сомничат за кривично дело – тероризам, а во текот на ноќта уапсен е уште еден напаѓач.
Доцна синоќа продолжи акцијата на косовската полиција за пронаоѓање останатите од групата која изврши напад врз косовските полициски службеници, а која според косовското Министерство за внатрешни работи броела 30 лица, маскирани и во униформи, и вооружени со тешко оружје. Рации се извршени на одредени локации, стамбени згради и возила, како и во возилата околу манастирот во селото Бањска. Според првите информации пронајдени се стотици парчиња оружје, униформи и логистичка опрема, меѓу кои и гранати, пиштоли, митралези, калашникови, зољи и друго оружје од тежок калибар. Денеска се проверуваат и верниците од манастирот Бањска, за да се утврди дали меѓу нив имало помагачи.
Трупите на КФОР и Еулекс се уште се во состојба на готовност, а меѓународната заедница одигра голема улога во смирување на ситуацијата на терен. Посебно се разговараше и со Курти и со Вучиќ, а специјалниот пратеник на Европската унија за дијалог меѓу Косово и Србија, Мирослав Лајчак вели дека инцидентот на северот на Косово е длабоко загрижувачки и е во спротивност со принципите на мирот и соработката.
„Овој страшен напад дополнително ја нагласува неопходноста од превентивна дипломатија и дијалог, што беше нагласено минатата недела за време на Генералното собрание на Обединетите нации во Њујорк“, напиша Лајчак на Фејсбук.
Но, според реториката на двете страни, тешко дека наскоро Курти и Вучиќ ќе седнат на иста маса.
- Никогаш нема да ја признаеме независноста на Косово. Можете да не убиете сите. Можете да правите што сакате. Никогаш нема да ја признаеме независноста на Косово. Србија никогаш нема да ја признае независноста на Косово, тоа чудовиште што го направивте со бомбардирањето на Србија, изјави Вучиќ.
Денешниот ден на Косово е прогласен за ден на жалост, во чест на полицискиот старешина, Африм Буњаку, кој беше убиен во нападот. И Вучиќ го осуди убиството на полицаецот рече дека е нешто што никому не му треба, но и предупреди дека Курти сака да ја доведе Србија во конфликт со НАТО.
Последниот инцидент, се случува по нешто повеќе од една недела откако неуспешно завршија преговорите меѓу Белград и Приштина за подобрување на односите.
Алиса Шутиноска