Соседна Албанија денеска го почнува пребројувањето на своето население и домаќинствата во земјата, а пописот треба да заврши на 30ти октомври. Македонските друштва и асоцијации ги повикаа македонците кои живеат таму да ја поддржат оваа значајна статистичка операција и слободно да се изјаснат за етничката и верска припадност и јазик.
Во повикот се вели дека ова е многу важен процес бидејќи во него ќе се декларира и етничката припадност на секој поединец. Се наведува и дека врз основа на Законот „За заштита на националните малцинства во Република Албанија“, од 2017 година, правата на малцинствата како што се правото на образование на мајчин јазик, употребата на мајчиниот јазик во локалните институции, употребата на мајчиниот јазик на патната сигнализација, застапеноста во јавните институции и слично се поврзани со нивниот број.
И македонското МНР ги охрабрува сите Македонци слободно да ја изразат својата етничка, јазична и религиска припадност.. А тамошните активисти за правата на Македонците во Мала Преспа и Голо Брдо побараа од Македонците да не потклекнуваат под никаков притисок.