Речиси две третини од македонските граѓани, или 65 проценти не се согласуваат со уставните измени неопходни за комплетирање на фазата за отворање на преговорите за членство, покажува Анализата на јавното мислење изработена од Институтот за демократија „Социетас цивилис“ и Фондацијата „Конрад Аденауер“ која што е насловена „Европа во криза. Последиците врз јавното мислење во Северна Македонија“. Според етничката припадност, мнозинство од 80% на етнички Македонци се против уставни измени, додека пак, 53% од испитаници идентификувани како етнички Албанци даваат поддршка на уставните измени.
26% од испитаниците сметаат дека Бугарите и останатите засегнатите малцинства треба да бидат вклучени во Преамбулата на Уставот на државата.
Анкетата покажува дека повеќе од две третини (69%) од испитаниците сметаат дека описот за службен јазик треба да се задржи во својата постојна форма, според која службен јазик е македонскиот и оној кој го говори 20% од населението. Етничките Албанци имаат поделени мислења во однос на описот на службен јазик во Уставот. Скоро половина од нив (47%) сметаат дека истиот треба да биде променет во „службени јазици се македонскиот и албанскиот”.
Оваа анкета исто така повторно забележува опаѓање на поддршката за членство во ЕУ. 64 проценти од граѓаните се за членство во ЕУ, доколку следната недела би се одржал референдум, но, во исто време има подобрување на перцепцијата кон Унијата како најдобар сојузник на земјата.