Најмалку 1.500 луѓе загинаа во земјотресите во Турција и во Сирија во рок од 12 часа. Се очекува бројот на жртвите да се зголеми, а операциите за пребарување и спасување се во тек низ целиот регион.
Официјалните податоци од Турција велат дека таму загинале 1.014 лица, биле повредени 5.383 лица, а се урнале 2.818 згради. Сириското Министерство за здравство соопшти дека загинале повеќе од 326 лица, а 1.042 се повредени. Дополнително на тие бројки, спасувачката служба „Бели шлемови“ во северозападна Сирија во областите контролирани од невладината соопшти дека бројот на загинати е 221, со што вкупниот број на потврдени смртни случаи достигна 1.561.
Повеќе од 10 тимови за пребарување и спасување од Европската унија се мобилизирани по големиот земјотрес што ја погоди Турција, изјави портпаролот на Европската комисија. САД, Велика Британија, Израел, Русија и Кина се меѓу другите нации кои јавно се понудија да помогнат.
Првиот земјотрес се случил додека луѓето спиеле, а бил со јачина од 7,8 степени според Рихтеровата скала, што е еден од најсилните земјотреси во регионот во најмалку еден век. Се почувствува дури до Кипар и Каиро. Европскиот медитерански сеизмолошки центар (EMSC) соопшти дека прелиминарните податоци покажуваат дека вториот силен земјотрес бил со јачина од 7,7 степени според Рихтеровата скала и бил на 67 километри североисточно од Кахраманмараш, Турција, на длабочина од 2 километри. Сеизмолозите регистрираа повеќе од 100 помали последователни потреси.