Иако официјалните бројки на заразени со ковид 19 во Тетово бележат благо покачување, сепак амбулантите имаат наплив на пациенти.
Најголем дел од лицата кои се обраќаат кај матичните лекари имаат симптоми на ковид.
Доктор Светлана Трифуновска, вели дека варијантата на ковид 19 која сега е присутна за среќа дава полесна клиничка слика, но е многу заразна, а овој период во градот има голема раздвиженост, поради доаѓањето на печалбарите и организирањето семејни свечености.
Според Доктор Трифуновска загрижува фактот што голем дел од пациентите не се тестираат или прават брзи тестови, но на тој начин не се евидентирани во системот.
На Инфективното одделение во Клиничката болница во Тетово има 1 хоспитализирано лице со ковид 19, но бројот на амбулантските прегледи се зголемува.
Во изминатите 24 часа биле прегледани 60-тина лица, од кои најголем дел имале симптоми на ковид или веќе потврдени случаи.
Докторите повторно ја истакнуваат важноста на имунизацијата.
Иако вакцината не штити од високото ниво на контагиозност, таа штити од тешка клиничка слика и постковид компликации.
Препораките се ризичните групи да примат бустер доза.
Данијела Билбилоска