На плажата во Катерини вчера биле откриени шорцеви за капење , слични на тие што ги носел 30 годишниот Мартин Јовановски, кој исчезна пред 13 дена во водите на Егејското море, кај местото Посиди, на Халкидики.
Шорцевите меѓу алги ги пронашло лице, кое не ги земало, туку ги фотографирало и фотографијата ја испратило на спасувачкиот тим ОФКАТ.
Како што објави шефот на спасувачкиот тим, Христос Рамос, по добивањето на фотографија тимот веднаш се упатил на местото каде биле пронајдени шорцевите, но не пронашле ништо што би можело да го подигне моралот на семејството на Мартин.
„Пристигнавме на местото и со подршка на спасувачкиот тим Пиерија- ДОП, кој ни даде чамец ја пребаравме областа до делтата Аксиос, но залудно. Фотографијата беше доволна семејството да поверува дека шорцевите се на Мартин. Кога мајка му го виде костимот за капење рече дека личи на тој што го носел нејзиниот син“ – вели шефот на спасувачкиот тим ОФКАТ, Христос Рамос.
Според Рамос, истрагата по Мартин продолжува со брод покрај брегот на Егејското море кон Коринос, Пидна , Аликес Китрос, до периферијата на Аксиос.
Покрај грчкиот спасувачки тим, во истрагата се вклучени и волонтери од Македонија.
Сеуште е отворена и сметката за донации за истрагата што ја отвори 30 годишниот Иван, второпронајдениот од тројцата другари кои заедно со Мартин на 9 јули беа одвечени од морските струи далеку од брегот ,кога влегле да се искапат.
Прв по несреќата беше пронајден и спасен 25 годишниот Васил.
Сотир Трајков